2026ko maiatzaren 21a
Iruñerriko hamabost udalek (Iruña, Eguesibar, Barañain, Aranguren Ibarra, Burlata, Berriozar, Galar Zendea, Atarrabia, Esteribar, Zizur Nagusia, Orkoien, Zizur Txikia, Uharte, Ezkabarte eta Antsoain) interesa agertu dute Iruñeko Udalak eta Iruñerriko Mankomunitateak sustaturiko bizikleta elektriko partekatuaren sistema elkartuarekiko, eta zerbitzua abian jartzeko eginen den lehenbiziko deialdian sartzea eskatu dute. Guztira 40 geltoki eta 400 bizikleta jartzeko eskaera jaso dira, Iruñean ezarri nahi diren 50 geltoki eta 500 bizikletei gehituko litzaizkiekeenak.
Zerbitzua kudeatzeko hamar urterako esparru-akordioa lizitatzea da asmoa. Lizitazioa enpresa bakarrari emanen litzaioke, zerbitzua abian jartzeko elementuek eta etorkizunekoek antzekoak izan behar baitute, bateragarriak eta sistema berdinen bidez kudeatu beharrekoak. Esparru-akordio horretatik eratorriko dira zerbitzua handitu eta eskualdera zabaltzeko bideratuko diren kontratuak. Esparru-akordio horretatik eratorritako lehen kontratua (hiri osoan zehar banatuko diren 500 bizikleta elektriko eta 50 geltoki) Iruñeko Udalari esleituko zaio.
2028ra arte, aurreikuspenen arabera orduan hartuko baitu Iruñerriko Mankomunitateak bere gain Iruñerri osoko zerbitzua, gutxienez beste hiru aukera eskainiko dira esparru-akordioarekin bat egiteko. Udal bakoitzak bere plangintza propioa eginen du, aurreikusi dituen geltoki guztiak batera, edo, bestela, aldika ezartzeko.
Instalatutako geltoki bakoitzeko 25.000 eurora arte ordaintzea, eta erabilgarri dagoen bizikleta bakoitzeko 245 euroko kostua aurreikusten du zerbitzua finantzatzeko proposamenak. Kopuru hori %33 murriztuko litzateke erabiltzaileei kobratuko zaizkien tarifei esker.
Ekimen honi esker, Iruñeko Udalak zuen bizikleta publikoen zerbitzua hiriaren errealitatera eta hiri-mugikortasunaren beharretara egokituko da, eta urrats berriak eginen dira Iruña 2030 Hiri Agendaren hiru proiektu gauzatzeari dagokionez: 106.PE – Bizikletaren Eskualdeko Plan Integrala, 107.PE – Iruñerriko Hiri Mugikortasun Iraunkorreko Plana, eta 112.PE – Mugikortasun elektrikoa.
Argibide gehiago, hemen