2026ko maiatzaren 21a<\/p>\n\n
Iru\u00f1erriko hamabost udalek (Iru\u00f1a, Eguesibar, Bara\u00f1ain, Aranguren Ibarra, Burlata, Berriozar, Galar Zendea, Atarrabia, Esteribar, Zizur Nagusia, Orkoien, Zizur Txikia, Uharte, Ezkabarte eta Antsoain) interesa agertu dute Iru\u00f1eko Udalak eta Iru\u00f1erriko Mankomunitateak sustaturiko bizikleta elektriko partekatuaren sistema elkartuarekiko, eta zerbitzua abian jartzeko eginen den lehenbiziko deialdian sartzea eskatu dute. Guztira 40 geltoki eta 400 bizikleta jartzeko eskaera jaso dira, Iru\u00f1ean ezarri nahi diren 50 geltoki eta 500 bizikletei gehituko litzaizkiekeenak.<\/p>\n\n
Zerbitzua kudeatzeko hamar urterako esparru-akordioa lizitatzea da asmoa. Lizitazioa enpresa bakarrari emanen litzaioke, zerbitzua abian jartzeko elementuek eta etorkizunekoek antzekoak izan behar baitute, bateragarriak eta sistema berdinen bidez kudeatu beharrekoak. Esparru-akordio horretatik eratorriko dira zerbitzua handitu eta eskualdera zabaltzeko bideratuko diren kontratuak. Esparru-akordio horretatik eratorritako lehen kontratua (hiri osoan zehar banatuko diren 500 bizikleta elektriko eta 50 geltoki) Iru\u00f1eko Udalari esleituko zaio.<\/p>\n\n
2028ra arte, aurreikuspenen arabera orduan hartuko baitu Iru\u00f1erriko Mankomunitateak bere gain Iru\u00f1erri osoko zerbitzua, gutxienez beste hiru aukera eskainiko dira esparru-akordioarekin bat egiteko. Udal bakoitzak bere plangintza propioa eginen du, aurreikusi dituen geltoki guztiak batera, edo, bestela, aldika ezartzeko.<\/p>\n\n
Instalatutako geltoki bakoitzeko 25.000 eurora arte ordaintzea, eta erabilgarri dagoen bizikleta bakoitzeko 245 euroko kostua aurreikusten du zerbitzua finantzatzeko proposamenak. Kopuru hori %33 murriztuko litzateke erabiltzaileei kobratuko zaizkien tarifei esker. <\/p>\n\n
Ekimen honi esker, Iru\u00f1eko Udalak zuen bizikleta publikoen zerbitzua hiriaren errealitatera eta hiri-mugikortasunaren beharretara egokituko da, eta urrats berriak eginen dira Iru\u00f1a 2030 Hiri Agendaren hiru proiektu gauzatzeari dagokionez: 106.PE \u2013 Bizikletaren Eskualdeko Plan Integrala, 107.PE \u2013 Iru\u00f1erriko Hiri Mugikortasun Iraunkorreko Plana, eta 112.PE \u2013 Mugikortasun elektrikoa.<\/p>\n\n